Поиск

Ընդունելության քննությունների համար դիմորդներից գանձած գումարը կվերադարձվի հոկտեմբերին. ԳԹԿ


Ընդունելության այս տարվա քննություններից ամիսներ են անցել, սակայն մի քանի քննության համար դիմորդների վճարած գումարները դեռ չեն վերադարձվել նրանց: Արդեն տեւական ժամանակ մի շարք ծնողներ սոցիալական ցանցերի տարբեր հարթակներում հարցնում են՝ ե՞րբ են հետ ստանալու խոստացված գումարը:

Հիշեցնենք, որ այս տարի նոր կորոնավիրուսի համավարակով պայմանավորված՝ ընդունելության քննությունների թիվը կրճատվեց, եւ դիմորդներն ընդամենը մեկ քննություն հանձնեցին: Նրանց տեղեկացվել էր, որ նախապես մի քանի քննության համար վճարված 1500-ական դրամները կվերադարձվեն, կպահվի միայն մեկ քննության համար նախատեսված 1500 դրամը։ Հայտնի է, որ դիմորդները Գնահատման եւ թեստավորման կենտրոնում հայտագրվելու ժամանակ սահմանված կարգով նաեւ վճարում են յուրաքանչյուր քննության հաշվարկով: 

Ե՞րբ ու ինչպե՞ս է նախատեսվում վերադարձնել այդ գումարը, փորձեցինք ճշտել Գնահատման եւ թեստավորման կենտրոնից: ԳԹԿ-ի մամուլի քարտուղար Խաչանուշ Գրիգորյանը տեղեկացրեց, որ գումարը միանշանակ կվերադարձվի, մինչեւ սեպտեմբերի վերջ կմշակվի այն վերադարձնելու մեխանիզմը, եւ արդեն հոկտեմբերին գործընթացը կիրականցվի: Դեռեւս հայտնի չէ, թե ինչ մեխանիզմով՝ դիմումների հիման վրա, թե մարտին ներկայացված հայտերն ուսումնասիրելով կկատարվի գործընթացը: Մեխանիզմի, կարգի ու հստակ ժամկետների մասին ավելի ուշ հայտարարություն կանի ԳԹԿ-ն:

Հարցին՝ ինչո՞ւ է այսքան ձգձգվել դիմորդների գումարը վերադարձնելու գործը, Գրիգորյանը նշեց, որ դա բավականին աշխատատար գործընթաց է, 100 հոգուն վճարը ետ վերադարձնելն ուրիշ է, 15.000 դիմորդի գումարն ուսումնասիրելն ու վերադարձնելը՝ ուրիշ: